SA PANAHON ngayon, totoong mahal ang magkasakit. Hindi ito biro dahil ang pagkakasakit ay may kaakibat na gastusin. Kaya naman ang PhilHealth ay itinatag upang maging kaagapay ng bawat Pinoy sa mga oras na gaya nito. Ngunit ang tanong, mahirap ba o madali ang pag-avail ng benepisyong PhilHealth? ‘Yan ang pag-usapan natin ngayon.
Ang kadalasang iniisip ng ating mga kababayan kapag sila ay nagkasakit o naospital ay kung sila ba ay kwalipikado sa benepisyong PhilHealth. Gayundin kung ano ang mga dokumento na hihingin sa kanila para magamit ang benepisyo. Ang maling akala ng karamihan ay mahirap ang proseso ng pag-a-avail ng benepisyo kung kaya’t minsan ay minamabuti na lamang na huwag magpa-admit o kaya’y huwag mag-avail ng PhilHealth benefits. Simple lamang ang paraan upang tayo ay makagamit ng benepisyo mula sa PhilHealth.
Ano nga ba ang kailangang ihanda para maging hassle-free ang paggamit ng benepisyo?
Kung updated ang inyong membership record at kontribusyon, at accredited naman ng PhilHealth ang pasilidad na iyong pinuntahan, siguradong walang aberya ang paggamit mo ng benepisyo.
Sa oras na kayo ay ma-admit, at mayroong Health Care Institution Portal o HCI Portal ang ospital, mag-presinta lamang ng isang (1) valid ID upang maberipika ang inyong pagkakakilanlan.
Sa pamamagitan ng HCI portal, malalaman na ng pasilidad kung kayo ay kwalipikado o hindi sa benepisyo. Dahil dito, hindi na rin ninyo kailangang magdala ng Member Data Record o MDR.
Ang HCI Portal ay maaaring sumagot ng “YES” kung ang miyembro ay kwalipikado. Dito, wala nang kailangan pang dokumentong hingin sa miyembro. Kung ang HCI Portal naman ay sumagot ng “NO”, huwag mag-alala sapagkat iko-comply mo lamang kung ano ang isinasaad na discrepancy mula sa Portal. Ang mga kadalasang dahilan kung bakit sumasagot ng “NO” ang HCI Portal ay dahil hindi nakadeklara sa iyong record ang iyong dependent, kung halimbawang siya ang pasyente; o di kaya naman ay may kulang kang kontribusyon, at iba pa.
Pero huwag mabahala, kung may discrepancy sa inyong record, magsumite lang sa ospital ng pinunan na PhilHeallth Member Registration Form o PMRF at kinakailangang supporting documents. Kung ang tinukoy naman ng Portal ay kakulangan sa kontribusyon ay bayaran lamang ang nakaligtaang buwan at maaari nang maka-avail ng benepisyo.
Kung sakali naman na walang kakayahang magbayad ng kontribusyon, lumapit po tayo sa social welfare ng ospital para ma-assess at posibleng mai-enroll sa Point of Service o POS. Maaari ring mag-inquire sa nakatalagang PCARES sa ospital tungkol dito. Ang PCARES ay mga empleyado ng PhilHealth na itinalaga sa piling mga ospital upang mag-assist sa mga miyembro.
Alam n’yo ba na maging ang confinements abroad ay kino-cover din ng PhilHealth? Mayroong namang 180 days para maisumite ang mga dokumento sa alinmang tanggapan ng PhilHealth.
Layon ng Universal Health Care na ang bawat Filipinong magkakasakit ay makakukuha ng benepisyo mula sa PhilHealth. Karapatan po natin ito.
Kung may tanong tungkol sa PhilHealth, magpadala ng text message sa 0921-6300-009 upang makatanggap ng callback mula sa aming Action Center. I-email ang inyong suhestiyon at kumento sa [email protected]
BENEPISYO MO, ALAMIN MO!
Covered ng PhilHealth ang Outpatient HIV-AIDS Package na nagkakahalaga ng P30,000.00 kada taon o (P7,500 kada quarter)