GMA-7 IDINARAMAY SA PROBLEMA NG PRANGKISA NG ABS-CBN

NAGTATAKA lang kami kung bakit idinadamay ng iba ang GMA sa problema ng ABS-CBN tungkol sa prangkisa nila. Kesyo umeere raw ang GMA noon na walang prangkisa. Wala naman kaming natatandaan na ganoong pangyayari at ang alam namin ay bago pa man mag-expire noon ang prangkisa nila ay nakakuha na ng approval ang Kapuso Network ng bagong prangkisa.

Hindi pa rin talaga nawawala ang mga fake news gaya ng mga ipinapakalat ngayon ng iba tungkol sa paglaganap ng coronavirus o COVID-19 na dapat ay united ang buong bansa sa pagsugpo nito. Hindi ninyo ba napapansin na mayaman at mahirap ay apektado sa pandemic na ito?

Hindi pa man nag-e-expire ang prangkisa ng Kapamilya Network ay napansin namin na may mga naglipatan na sa Kapuso Network at may iba pang nagpaparamdam din. Kung mangyari man ang takot ng iba na sa tingin ko ay hindi naman mangyayari, saan na magtatrabaho ang iba na ang alam lang gawin ay may kinalaman sa TV productions.

Gustuhin man ng Kapuso Network ay hindi naman kaya ma-accomodate lahat.

Kaya hindi dapat pag-awayin ang dalawang Network at dapat magtulungan. Sa katunayan ay very vocal ang napakaraming GMA talents na pabor sa renewal ng prangkisa nila. Tigilan na ‘yang awayan na ‘yan sa gitna ng problema natin sa COVID-19.

Natutuwa naman kami sa napakagandang ratings na nakukuha ng GMA at maski sa Visayas ay ma­rami na ang tumututok sa mga programa nila base sa napakalakas na ratings plus na-dominate na rin nila ngayon ang mga primetime teleserye nila. Sana mapa­natili nila ‘yan.

SUPPORTERS NI ALDEN RICHARDS VERY ACTIVE, ’DI HUMIHINTO SA PAG-TWEET

VERY active ang mga Alden supporters base sa mga tweets nila na nababasa namin.

Sobra ang pasasalamat nila na hindi sila basta Alden followers lang kundi ramdam nila ang pagmamahal at pasasalamat ni Pambansang Bae sa mga suporta nila. Kung may panahon si Alden Richards sa gitna ng marami niyang ginagawa ay nakahahanap pa rin ito ng libreng oras para makapiling sila.

Kamakailan lang ay nagkaroon ng get together ang fans at hindi ito pina­lampas ni Alden at pinaunlakan ang imbitasyon nila.

May mga bashers din si Alden na ‘yun na lang yata ang trabaho nila na i-bash nang i-bash si Alden. It’s either naiinggit sila sa mga magagandang blessings na dumarating kay Alden, samantalang matumal ang dumarating sa mga kinababaliwan nila or pakawala ng mga katunggali ni Alden kung mayroon man. Natatawa na lang ako sa mga komento nila na parang ‘yun na lang ang ginagawa nila araw-araw.

Naku, magbago na kayo at Kuwaresma na at alagaan na lang ang mga sarili ninyo at makaiwas sa coronavirus.

JERIC GONZALES INI-RELEASE ANG BAGONG AWITIN SA GMA MUSIC

MUKHANG ma-e-extend na naman ang panghapong teleserye ng GMA na Magkaagaw. Tuloy-tuloy pa rin ang agawan kay Jeric Gonzales na gu­maganap bilang Jio na asawa ni Klea Pineda. Minsan nakababaliw ang awayan nila at hindi pa namin alam kung saan hahantong ito. Natutuwa naman ang GMA management at nakuha muli nila ang formula na nakapagbibigay-aliw sa mga manonood tuwing hapon kasama ang Prima Donna at Bilangin Mo Ang Mga Bituin.

Samantala, ini-release na ng GMA Music ang bagong kanta ni Jeric Gonzales na Line To Heaven. Maganda ang bagong kantang ito na ini-release ng GMA Music nitong March 10.