GOV., 14 MAYORS SA ILOCOS BAKUNADO NA

ILOCOS NORTE-NABAKUNAHAN si Ilocos Norte Governor Matthew Manotoc at ang 14 alkalde nito na ginanap sa Governor Roque B. Abkan Sr. Memorial Hospital noong Biyernes ng umaga.

Sa ilalim ng Advisory No. 26 ng National Vaccination Operations Center na inaprobahan ng National IATF for the Management of Emerging Infectious Diseases, naunang binakunahan ang 4,000 medical healthcare workers gayundin ang local chief executives na nakatala sa COVID-19 critical or high-risk areas bilang priority vaccinees.

Ayon kay Gov. Manotoc, ang kagustuhan nitong mabakunahan ay upang ipakita ang kumpiyansa sa bakuna at magbigay-daan para maniwala din ang frontliners sa pagbabakuna sa kabila g pag-amin ng mga opisyal sa lalawigan na mayroong ibang health workers partikular sa mga pampublikong ospital na nagdadalawang-isip pa rin kung magpapabakuna.

Ayon sa mga health consultants ng probinsiya, nananatiling mababa ang kumpiyansa sa bakuna mula sa hanay ng healthcare workers.

Kabilang sa 14 alkalde na nagpabakuna ay mula sa mga bayan ng Sarrat, Pinili, Marcos, Nueva Era, Banna, Paoay, Currimao, Adams, Pagudpud, Bacarra, Piddig, Carasi, Laoag City, at sa Batac City.

Nauna nang nagpabakuna noong Abril 7 ang mga alkalde ng Dingras at Badoc habang ang alkalde ng

San Nicolas na pawang manggagamot din ay nagpabakuna noong pang Marso.
Kasabay nito, nananawagan ang provincial government sa pamahalaan na madaliin ang pagbili ng vaccine laban sa COVID-19 upang mabakunahan na ang iba pang opisyal na frontliners din. MHAR BASCO