GRADE 11 SINAKSAK NG LOLO

MALABON CITY – KRITIKAL  ang isang 17-anyos na Grade 11 student matapos saksakin ng isang 61-anyos na lolo sa Malabon City.

Isinugod sa Tondo Medical Center kung saan ginagamot ang tinamong saksak sa katawan ng biktima na itinago sa pangalang “Roger” ng Burgos St. Brgy. Concepcion.

Nahaharap naman sa kaukulang kaso ang suspek na nakilalang si Joel Cruz, 61-anyos ng 64 A De Jesus St. Brgy. Concepcion.

Sa report ni PCMS Ana May Pascua ng Malabon Police Women’s and Children Protection Desk kay City Chief of Police Col. Jessie Tamayao, alas-5 ng madaling araw nang maganap ang pananaksak ng suspek sa biktima sa Samson St. Brgy. Baritan.

Matapos ang insidente, nagtungo pa ang suspek sa Malabon Police Community Precinct (PCP)-7 para magsampa ng reklamo kontra sa apat katao na nambugbog umano sa kanya bandang alas-8:20 ng umaga.

Gayunman, matapos ang pagtatanong ng pulisya sa ilang nakasaksi sa insidente ay napag-alaman nila na si Cruz ang sumaksak sa estudyante matapos ituro ng mga saksi na naging dahilan upang arestuhin ang suspek na positibo rin kinilala ng biktima na sumaksak sa kanya. VICK TANES