GRADE 2 NAGBABASA NG MODULE BINARIL NG LOLO

ISABELA-ISANG Grade 2 student ang nasawi nang barilin ng lolo sa Purok 4, Barangay Mang­curam, Ilagan City.

Sa ulat ng Police Regional Office (PRO) 2, kinilala ang suspek na si Jose Baquiran,60-anyos habang ang biktima ay si Robin Carl Londonio, 9-anyos kapwa residente ng nasabing lugar.

Sa pagsisiyasat ng PNP Ilagan, kasalukuyan umanong nagbabasa sa kaniyang module ang bata nang dumating si Baquiran dala ang isang mahabang baril na hindi pa matukoy na kalibre.

Dahil sa nakita umano ng bata na may dalang baril ang suspek ay tinanong pa umano ng bata sa wikang Ilocano ang lolong si Baquiran,’’Apay uncle ano ti basol mi kanya nyo,’’ sa Tagalog, “bakit po uncle ano ang kasalanan namin sa inyo, at walang awang binaril ang biktima na tinamaan sa tiyan.

Isinugod sa pagamutan ang biktima subalit idineklarang dead on arrival ito.
Naaresto naman ang suspek sa hot pursuit ope­ration ng pulisya habang patuloy pa rin ang imbestigasyon ng PNP Ilagan upang malaman ang motibo sa pamamaril. IRENE GONZALES