GUIDELINES PARA SA PUBLIC TRANSPORTATION INILABAS NG DOTr; TAXI, TNVS BIYAHE NA

MATAPOS na aprubahan ng Pangulong Rodrigo Duterte ang  general community quarantine (GCQ)  sa Metro Manila simula sa Lunes  ay naglabas na ang  Transportation (DOTr) ng guidelines para sa public transportation.

Dalawang  phase ang pagpapatupad ng operasyon ng iba’t ibang pampublikong sasakyan.

Sa ilalim ng Phase 1 ay papayagan nang bumiyahe ang mga tren at ang mga bus na bahagi ng bus augmentation ng pamahalaan.

Puwede na ring bumiyahe ang  mga taxi, TNVS, shuttle services, P2Ps at bisikleta.

Bawal namang pumasok ang mga  provincial bus sa Metro Manila mula Hunyo 1 hanggang 22.

Sa ilalim naman ng Phase 2, simula sa Hunyo 22, 2020 ay  papayagan na ring bumiyahe ang mga  pampasaherong bus,  modern jeepney  at  UV express.

Bahala naman ang local government units (LGUs)  sa pagbiyahe ng mga tricycle.

Patuloy namang ipatutupad  ang physical distancing sa mga pampublikong sasakyan ganoon din ang pagsusuot ng face masks, pagpapatupad ng  no-contact measures tulad ng cashless payment, paglalagay ng mga thermal scanners ganoon din ang disinfection sa mga sasakyan at  mga terminal. PILIPINO MIRROR Reportorial Team