GUIDELINES SA MECQ INILABAS

NAGLABAS ng Public Advisory No. 37 ang lokal na pamahalaan ng Parañaque bunsod sa kasalukuyang ipinatutupad na guidelines ng modified enhanced community quarantine (MECQ) sa lungsod na magtatagal ng hanggang Agosto 31.

Ayon kay Parañaque City Mayor Edwin Olivarez, bagaman naibaba na sa mas maluwag ang qua­rantine status na MECQ ay ipagpapatuloy pa rin ang pagpapatupad ng alas-8 ng gabi hanggang alas-4 ng umaga na curfew hours sa lungsod at ang mga lalabag dito ay maaaring hulihin na naaayon sa batas.

Sa pag-eehersisyo tulad ng paglalakad, jogging, running o biking ay pinapayagan lamang sa loob ng kani-kanilang mga subdibisyon, purok, village o barangay at kailangang sumunod sa public health standards at physical distancing.

Nananatiling naman na ipinagbabawal sa lungsod ang operasyon ng mga indoor/outdoor na palakasan (sports), entertainment venues, cinemas, casinos, beauty salons, parlors, barber shops, nail spas at ang indoor/outdoor al fresco dine-in services.

Ipinagbabawal pa rin ang pagbebenta at pagbili ng alak o nakalalasing na inumin sa lahat ng establisimiyento sa lungsod habang ang opersyon ng mga malls at commercial centers sa lungsod ay hanggang alas-7 ng gabi lamang.

Ang pagbubukas ng mga palengke, talipapa at sari-sari stores ay papayagan ng mula ala-6 ng umaga hanggang ala-6 ng gabi lamang habang ang mga pharmacy/drugstore at mga gasolinahan ay pinapayagang manatiling bukas ng 24-oras.

Magpapatuloy pa rin ang pagbibigay ng serbisyo ng lokal na pamahalaan sa pamamagitan ng on-site skeletal workforce at work from home (WFH) arrangement.

Muli namang pinaalalahanan ang mga residente ng lungsod na sumunod sa mga health protocols na pinaiiral ng Inter-Agency Task Force (IATF), department of Health (DOH) at iba pang ahensya ng gobyerno gayundin ang tamang pagsusuot ng face mask at face shield at pag-oobserba ng physical distancing sa mga pampublikong lugar. MARIVIC FERNANDEZ