IBINAHAGI ng Philippine Charity Sweepstakes Office (PCSO) na hindi bababa sa 60,000 Pilipino ang nakinabang sa mahigit P400 milyon na inilabas ng ahensya sa tulong medikal sa unang quarter ng 2023.
“Nasa 60,779 kababayan natin ang natulungan sa kanilang gastusing pang-medikal, na umabot sa P410,427,957.55 na inilabas ng PCSO sa pamamagitan ng Medical Access Program,” ani PCSO Chairman Junie E. Cua.
“Asahan po ninyo na tuloy-tuloy lang ang PCSO sa adhikain nitong matulungan ang sambayanang Pilipino. Paiigtingin pa natin ang serbisyo para mas marami pang kababayan natin ang makinabang,” dagdag pa ni Cua.
Ayon sa PCSO, ang Medical Access Program (MAP) ay sumasaklaw sa iba’t ibang mga request para sa fund augmentation para sa mga medical concerns tulad ng confinement, dialysis injection, paggamot sa kanser, hemodialysis, laboratoryo, diagnostic, at mga imaging procedures, gayundin sa implant at mga medikal na kagamitan, atbp.
Anila, ang MAP ay kinuha mula sa Charity Fund na binubuo ng 30 porsiyento ng mga net receipt, at eksklusibong ginagamit upang pondohan at suportahan ang mga programang pangkalusugan, tulong medikal, mga serbisyo, at mga kawanggawa na may national character.
Ang PCSO ay kumakalap ng mga pondo sa pamamagitan ng mga sweepstakes, karera ng kabayo, lottery at mga kahalintulad na aktibidad.
Nagpahayag si Cua ng positibong pananaw na ang ahensya ay makakapaglingkod sa mas maraming Pilipino ngayong taon at lalampas sa mga numerong naitala nito noong 2022.
Napag-alaman na noong nakaraang taon ay nakapaglabas ang PCSO ng P1,395,310,206.43 sa 210,731 na benepisyaryo.
“We are aggressively looking for ways to generate more revenue in compliance with Pres. Ferdinand Marcos, Jr.’s marching order to continue pushing the envelope for the benefit of our people. So hopefully, these efforts will bear fruit and we will be able to help more Filipino families,” ayon kay Cua.