HIGH SCHOOL STUDE ARESTADO SA MARIJUANA TRADE

CAVITE – Nawasak ang pagiging high school student ng 20-anyos na lalaki na sinasabing nagpapakalat ng droga makaraang masakote ng mga operatiba ng Intelligence Unit ng pulisya sa isinagawang anti-drug operation sa bahagi ng pamilihang bayan sa Barangay Poblacion 3 sa bayan ng General Emilio Aguinaldo, Cavite  kamakalawa ng gabi.

Isinailalim sa drug test at physical examination bago dalhin sa police custodial center ang suspek na si John Darwin Junio y Claro ng Brgy. Castanos Cerca sa nabanggit na bayan at estud­yante sa Emilio Aguinaldo National High School.

Base sa police report na nakarating sa Camp Pantaleon Garcia, nakatanggap ng ulat si P/Senior Insp. Rodel Salvador laban sa suspek na nagbebenta ng pinatuyong dahon ng marijuana sa labas ng pamilihang bayan sa nasabing lugar.

Isinailalim sa masusing surveillance ang suspek kung saan naging positibo naman sa drug trade kaya ikinasa ang anti-drug operation bandang alas-9:15 ng gabi.

Nasamsam sa suspek ang dalawang plastic sachet na marijuana at P200 marked money na ginamit ng pulisya sa anti-drug operation.

Nahaharap sa kasong paglabag sa Sec 5 at 11 ng RA 9165 ang suspek habang isinailalim sa chemical examination ang nakumpiskang marijuana.       MHAR BASCO