HINAY-HINAY SA PAGLALABAS NG PANGALAN NG 2ND BATCH NG NARCOLIST

UMAASA  ang Commission on Elections (Comelec) na hindi na mauulit ang pagsasapubliko ng  mga pangalan ng  hinihinalang  narco-politician na nasa listahan ni Pa­ngulong Rodrigo Duterte.

Ito ay kasunod ng na­ging pahayag ng Department of the Interior and Local Government  na may ikalawang batch pa ng narcolist ang kanilang ilalabas.

Sinabi ni Comelec Spokesperson James Jimenez  na  “unfair” at nakakaapekto sa pamilya ng sinasabing narco-politicians ang pagsasapubliko sa ka-nilang pangalan lalo na kung sila ay  napagbintangan lamang, na mistulang “trial by publicity”.

Nilinaw ng Comelec na labas ang kanilang tanggapan sa susunod na hakbang ng DILG  laban sa mga narco-politician.

Hindi  umano  papayag  ang Comelec na pilitin sila ng DILG para i-disqualify ang mga pinangalanan nilang  mga kandidato o politiko dahil ang may final conviction lang sa korte ang maaari nilang idiskwalipika sa kanilang kandidatura.

Pinayuhan  ni Jimenez ang  DILG na  mag-focus sa pangangalap ng mga ebidensyang magdidiin sa mga inakusahan nilang opisyal.

Nanindigan naman si Philippine Drug Enforcement Agency  Spokesman Usec. Derrick Carreon na tama at may sapat na batayan ang ginawa nilang narco list na isinumite  kay  Pangulong Duterte.

Kasunod ito  ng pag-amin ng pambansang pulisya na hindi pa sapat ang kanilang hawak na ebidensya para masampahan ng kasong kriminal ang mga politikong sangkot dito.

Sa panayam ng DWIZ kay Carreon, umabot umano aniya sa 14 na buwan o mahigit isang taon ang ginawa nilang revalidation at verification sa mga pangalang kabilang sa narco list.

Katuwang nila rito ang iba pang miyembro ng  Inter-Agency Council on Illegal Drugs (ICAD) tulad ng National Intellegence Coordinating Council, DILG, PNP at AFP.