MASBATE – Dumagsa sa Matayum Lagoon sa bayan ng Cataingan ang boxing fans para sa inaabangang Bakbakan sa Masbate 2 nitong Sabado.
Nagwagi si dating WBO Oriental super bantamweight champion Jeo “Santino” Santisima via TKO sa ikaapat na round laban kay Thai title holder Arnon Yupang para sa inaasam na WBC Asia Continental super featherweight belt.
“Unang-una, nais kong ipahayag ang aking lubos na pasasalamat sa aking mga kapwa Masbateño, lalo na kay Gobernador Antonio Kho,” wika ni Santisima.
Bukod dito, nanalo rin ang nakababatang kapatid ni Santisima na si Alex Santisima Jr. kontra Jastine “Philippine Tiger” Darap sa isang kapana-panabik na laban para sa WBF Austro-Asia Bantamweight belt.
Tinalo naman ni WBC Asian Silver flyweight titlist Michael “Hot N’ Spicy” Dasmarinas ang pambato ng Elorde Gym na si Jon Jon “Wolverine” Estrada para makuha ang Philippine featherweight title.
Higit na nagpataas ng excitement sa laban nang igupo ni Esneth “Hard Hitter” Domingo si Enrique Magsalin para sa WBC Asia flyweight strap.
Panalo naman si Alvin Camique ng General Santos Amoy Gym laban kay Bienvinido “Sniper Ben Fairtex” Ligas via TKO para sa WBF International Super Flyweight title.
Ang bakbakan ay kasabay ng makulay na Bagat-Dagat Festival 2024 na perpektong pinaghalo ang kilig ng boksing sa mayamang pamana ng kultura ng Masbate.
Ang buong suporta ni Governor Antonio Kho, katuwang si Rep. Zaldy Co ng Ako Bicol Partlist para sa turismo at palakasan ay naglagay sa Masbate bilang isang frontrunner para sa mga international boxing event.
RUBEN FUENTES
