IBALIK ANG MAAYOS NA PAGNENEGOSYO SA 5 PARAAN NA ITO

AYON sa isang pag-aaral, 30 porsiyento ng mga startup na negosyo  ay nagsasara sa loob ng unang dalawang taon. Mada-las kasi, gumugulo ang maraming bagay habang pilit na pinalalaki ang isang startup.

Narito ang limang tips ko upang maging mas maayos ang pagnenegosyo mo. Ano, tara na!

#1 Huwag pilit gawin ang lahat nang mag-isa

Sa ilang taon kong pagnenegosyo, sadyang mahirap talagang pigilan ang sarili na sarilinin ang lahat ng mahahalagang gawain sa isang negosyo, lalo na kung nagsisimula ka pa lamang. Sa totoo lang, ang delegasyon ng ilang trabaho ay dapat na ibigay sa mga eksperto o doon sa iyong na-train na tauhan. Mas mainam kasi na bilang pinuno, maging abala ka sa ‘vision’ ng kompanya  mo kaysa sa maliliit na bagay ituon ang pansin. Puwede ka ring mag-outsource. Ang mahalaga, ‘wag angkinin ang lahat ng trabaho.

#2 Mag-Invest sa ‘Digitization’

Marami nang mga bagay na digital na ang solusyon. Simula ‘yan sa simpleng website na siya mong tindahan sa Internet, gayundin sa social media kung saan ito’y kapareha na rin ng customer service.

Maraming bagay na puwede nang gamitan ng mobile apps. Madalas, libre ito kung kaunti lang naman ang gagamitin mo. Halimbawa, ang Google Drive ay maraming paraan na maging unlimited  ang storage mo. Makatutulong  ito sa pag-ayos ng mga file  mo. Sa payrolling at HR services, mayroon na ring digital na solusyon. Ang mahalaga ay maayos ang sistema mo na ‘di naman mahal, mas mabilis pa sa dating gawi. ‘Di ka pa kailangang magkaroon ng maraming files na papel.

#3 Planuhin nang maaga ang mga Kampanya mo sa Social Media

Madalas makaubos ng oras ang pag-iisip, pagpaplano at pag-execute ng mga plano sa social media. Pero may paraan naman na  i-schedule mo lang ang mga posting mo ay ayos na pala. Makakalibre ka na ng panahon na gagamitin sa ibang bagay. Simpleng scheduling lang panalo na!

#4 Paggamit ng mga Bagay Online at App sa mga Miting

Sana naman ay gu­magamit ka na ng pag-schedule ng mga miting mo sa cellphone. Kung ‘di pa, umpisahan mo na. Ang pag-gamit ng Google Calendar ay maaari  mong i-sync sa phone mo. May mga phone apps din na mag-aayos ng mga schedule mo. Ang mahalaga ay gumamit ka ng mga ganitong bagay at puwedena rin i-sync sa mga tauhan mo kung saan makikita mo kung maayos din ang paggamit nila ng oras.

#5 Sumentro sa Malalaking Bagay

Ang karamihan sa mga kilala kong matagumpay na negos­yante ay yaong mga nakatuon sa mas malala­king bagay kaysa  sa mga maliliit. Ang tinatawag na ‘micro-managing’  ay ‘di naaayon sa panahon ngayon ng pagnenegosyo. Mabilis kasi ang pagtatra-baho ngayon kaya naman kailangan, ikaw din ay ganoon.

Tandaan na kung mawala ka sa pokus sa dapat na paroonan ng negosyo mo, lahat ng bagay ay susunod doon.

o0o

Si Homer Nievera ay isang digital evangelist at founder ng Negosentro.com na tumutulong palawigin ang kaalaman saInternet at teknolohiya para maiangat ang kabuhayan ng mga Filipino. Kung may katanungan, magpadala ng mensahe sa [email protected].