INFRA SPENDING LUMOBO, P84.5-B NOONG HULYO

TUMAAS ang go­vernment spending ng double-digit noong Hulyo sa ilalim ng ‘Build Build Build’ program ng pamahalaan.

Ayon sa Department of Budget and Management (DBM), ang infrastructure spending at iba pang capital outlays ay umabot sa P84.5 billion, mas mataas ng  74.6 percent mula sa P48.4 billion noong nakaraang taon.

Batay sa datos, ang infrastructure spending sa unang pitong buwan ng taon ay nasa P437.2 billion, mas mataas ng 47 percent sa P297.5 billion na naitala sa kahalintulad na panahon noong nakaraang taon.

“Infrastructure and other capital outlays owing to the Build, Build, Build program continue to boost government spending,” pahayag ni DBM Secretary Benjamin Diokno.

Ang pagtaas ng infrastructure spending at iba pang capital outlays ay resulta ng mga proyektong pang-imprastruktura na ipinatupad ng Department of Public Works and Highways (DPWH), gayundin ng capital acquisition sa pamamagitan ng Armed Forces of the Philippines Modernization Program.

“Subsidies to government corporations totaled P32.5 billion, up 93 percent due to the P27.7 billion health insurance premiums of indigents enrolled under the National Health Insurance Program of the Philippine Health Insurance Corporation,” ayon sa DBM.

Ang irrigation projects at cash downloads para sa mga benepisyaryo ng Tax Reform Cash Transfer Project ay binibigyan din ng subsidiya ng pamahalaan.

“Total national go­vernment spending in July reached its peak so far at P328.1 billion, up 34 percent from P245.1 billion year-on-year,” dagdag pa ng DBM.

Samantala, ang fiscal spending sa unang pitong buwan ng taon ay nasa P1.932 trillion, mas mataas ng 23 percent mula sa P1.576 trillion.

“The fiscal numbers in July 2018 confirmed ­progress in our efforts to reduce underspending and instill public financial reforms,” ani Diokno.