UMAPELA si House Ways and Means Committee Chairman at Albay Rep. Joey Salceda sa Bangko Sentral ng Pilipinas (BSP) na i-regulate ang mga nagsulputan ngayon na online lending apps na nag-aalok ng short-term loans.
Sumulat si Salceda kay BSP Governor Benjamin Diokno at sa Monetary Board para hilingin na i-regulate ang ipinapataw na interest rates ng mga applications na nag-aalok ng pautang sa publiko.
Naalarma ang kongresista dahil ang interest rates na ipinapataw ng ilang kompanya ay umaabot ng 1% kada araw na may isang buwan na tenure.
Nababahala si Salceda na maging banta ito sa pinansiyal na kalakasan ng bansa dahil ang mga kompanya ng lending apps na ito ay hindi naman saklaw ng standards na sinusunod ng mga bangko.
Bilang co-chair ng House Defeat COVID-19 Committee (DCC) ay nanawagan din si Salceda sa BSP at sa Monetary Board na magtakda ng ‘cap’ sa interest rate sa mga lending apps at online payday loans katulad ng ipinatutupad sa mga credit card loan.
Batay sa National Baseline Survey on Financial Inclusion ng BSP noong 2014 at 2015, 4.4% lamang ang average ng mga Filipino na umuutang sa mga bangko habang 12% naman ng borrowings ay mula sa mga lending at financing companies.
Tataas pa sana, aniya, ito kung hindi nagsipasukan sa digital o online ang mga non-bank lending at financing activities. CONDE BATAC
Comments are closed.