DAHIL sa tumataas na kaso ng coronavirus o COVID-19 ay nagdesisyon ang Department of Tourism (DOT) na ipagpaliban ang isang buwang mall sale na 2020 Philippine Shopping Festival sa bansa.
Sinabi ni Tourism Secretary Bernadette Romulo-Puyat na prayoridad ng kagawaran ang kaligtasan ng bawat Filipino kaysa sa kita at visitor arrivals.
Layunin ng isasagawa sanang nationwide mall sale na palakasin ang turismo kasunod ng epekto ng travel restrictions bunsod ng COVID-19 na patuloy na tumataas ang kaso sa buong mundo sa nakalipas na mga araw.
Nakatakda sanang idalos ang mall sale mula Marso 1 hanggang Marso 31 upang makaakit ng local at foreign tourists. Inaasahang magdadala ito ng kita sa mga negosyo at makatutulong upang maibangon ang turismo mula sa epekto ng ipinatutupad na travel ban.
Nagpasalamat ang kalihim sa mga mall establishment na makikiisa sana sa aktibidad.
Nagpaalala ang kalihim sa publiko na sundin ang panuntunan ng DOH para maiwasan ang pagkalat ng COVID-19 tulad ng paghuhugas ng kamay at paggamit ng disinfectant.
Kamakalawa ay nagpahayag si Health Secretary Francisco Duque na dapat ay ipagpaliban muna ang planong nationwide mall sale upang hindi kumalat ang COVID-19 sa matataong lugar.
Ayon sa ulat, sa buwan lamang ng Pebrero ang bansa ay umaasang malulugi ng P14.8 billion sa turismo o kabuuang P42.9 billion kapag nagtagal ng tatlong buwan ang travel ban sa China, Hong Kong, Macau, at North Gyeongsang Province sa South Korea.
