INARESTO ng mga tauhan ng Quezon City Police District (QCPD) ang isang lalaki nang madiskubre ang marijuana sa loob ng isang condom na itinago nito sa kanyang maselang parte ng katawan nitong Sabado sa Kamuning.
Kinilala ni QCPD Director Nicolas Torre III ang suspek na si Ramon Dela Peña y Vedrio, 44-anyos na dinakip ng mga awtoridad dakong alas-3:55 kamakalawa ng hapon habang nagsasagawa ng body frisking at strip search sa mga bibisita ng QCJ Male Dormitory sa Kamuning, Quezon City nang makitaan ito ng isang condom na ipinasok sa kanyang tumbong na naglalaman ng droga.
Inutusan ang suspek na bunutin ito at doon, hinugot ng suspek ang nabanggit na bagay kaya naman nakuha ni JO1 Milagrosa mula sa suspek ang marijuana na nagtitimbang ng 56 gramo na may halagang DDB na P67, 200.00.
Narekober mula sa suspek ang 2 transparent plastic bag na naglalaman ng marijuana kush na may 5 pirasong glasses tubing, 2 test tube-like glass na naglalaman ng hindi tiyak na dami ng Marijuana Oil , 1 condom na may mga plastic sheet.
Sasailalim sa inquest proceedings ang suspek at sasampahan ng kaso na nakapaloob sa RA 9165 o comprehensive Drugs Act of 2002.
PAULA ANTOLIN