ISANG KARANGALAN AT PRIBILEHIYO

(Pagpapatuloy…)
Bilang paggunita sa ika-12 anibersaryo ng pagkamatay ni presidente Cory sa unang araw ng Agosto, at ang ika-40 araw naman mula nang pumanaw si presidente Noynoy noong ika-24 ng Hunyo, ang buong bansa ay nagbibigay-pugay at nagpapasalamat sa kanila.

Upang mapanatiling buhay ang kanilang alaala sa ating puso, bilang nagkakaisang bansa nararapat lamang na ating pahalagahan ang kanilang pamana at mga aral mula sa kanilang panahon bilang pinuno ng bansa.

Upang maipakita rin natin ang ating pagpapasalamat para sa kanilang pagsisilbi sa bayan, patuloy nating alagaan ang ating kalayaan, karapatan, at lahat ng kanilang naiwang pamana sa sambayanan.

Bahagi ng ating responsibilidad bilang mga Pilipino ang mamili ng mahusay na mga pinuno na magsisilbi sa bayan ng may katapatang kagaya ng ipinakita ni Cory at Noynoy.

Patuloy nating tinatamasa ang demokrasya sapagkat tinulungan tayo ni presidente Cory noon na ito ay makamit. Pinatatag naman ni presidente Noynoy ang ating ekonomiya at binigyan niya ng lakas at pag-asa ang mga Pilipino.

Ninais ni Noynoy na mapabuti ang kalagayan ng ating bansa, at nagawa naman niya ito. Para sa kanilang dalawa, hindi lamang responsibilidad ang maglingkod sa bayan, isang karangalan at pribilehiyo para sa kanila ang pagsilbihan ang mga Pilipino.

Para sa akin, isang karangalan at pribilehiyo para sa ating mga Pilipino ang magkaroon ng mga pinunong kagaya ni pangulong Cory at Noynoy. Taos-pusong nagpapasalamat ang bansang Pilipinas sa inyong paglilingkod.

Erratum: Nabanggit ko sa kolum noong Lunes, ika-2 ng Agosto na si Noynoy ay panganay sa magkakapatid. Paumanhin po rito–siya ay ikatlo sa mga anak nina Cory at Ninoy.

Related posts:

ISANG KARANGALAN AT PRIBILEHIYO