ISTRIKTONG QUARANTINE IPINATUTUPAD

NANAWAGAN si Senator Christopher ‘Bong’ Go sa lahat ng law enforcement agency na ipatupad ang istriktong quarantine.

Ang pahayag ni Sen. Go ay bunsod ng ginawang pag-apruba ni Pangulong Rodrigo Duterte sa rekomendasyon ng Inter-Agency Task Force (IATF) na isailalim muli sa enhanced community quarantine (ECQ) ang Metro Manila, gayundin ang mga kalapit nitong lalawigan ng Bulacan, Rizal, Cavite at Laguna simula ngayong araw, Marso 29, hanggang Abril 4.

Ayon kay Sen.Go, marapat lamang na magpatupad pa ng mas istriktong quarantine restrictions sa mga lugar na may mataas na kaso ng COVID-19, partikular na sa greater Metro Manila Area upang mas mabilis na matugunan ang mabilis na pagkalat ng sakit.

“Today, I welcome the approval of President Duterte of the recommendation of the IATF to place NCR, Bulacan, Rizal, Cavite and Laguna under ECQ effective March 29 until April 4,” ani Go, sa isang pahayag.

“Umaapela ako sa taumbayan, konting tiis lang po. Para ito sa kapakanan nating lahat. Ang ating sakripisyo, pagsunod sa patakaran, at pagtiwala sa awtoridad ay makapagliligtas ng buhay ng kapwa nating Pilipino,” apela pa ni Go.

Aniya pa, mas makabubuti kung patuloy na magbabayanihan at magmamalasakit ang lahat para sa ating kapwa, lalo na sa mga frontliners natin na binubuwis ang buhay para gampanan ang kanilang tungkulin. “Ang ating kooperasyon ay paraan upang mapagaan ang pinapasang hirap ng buong sambayanan,” aniya pa.

Nanawagan din ang senador sa publiko na gamitin ang panahong ito upang magpahinga at palakasin ang ating pananampalataya sa Diyos lalo na ngayong Semana Santa.

“Marahil, sinusubok lang ng Panginoon ang ating katatagan bilang Kanyang mga anak. Sariwain din natin ang naging sakriprisyo ng Panginoong Hesus sa pamamagitan ng ating pagmamahal sa ating kapwa.  Ang sabi nga ng awit sa simbahan, “Walang sinuman ang nabubuhay, para sa sarili lamang… Tayong lahat ay may pananagutan sa isa’t isa,” ayon pa kay Go. “For us to heal as one and recover as one, we must ACT AS ONE!”. PILIPINO MIRROR REPORTORIAL TEAM

Related posts:

ILANG SOLON HINDI PABOR SA EXTENSION NG ECQ BAGONG LISTAHAN NA NASA ECQ INILABAS PAG-IBIG FUND GRANTS GRACE PERIOD TO ALMOST 4.8-M BORROWERS AMID QUARANTINE HILING NA BALIK-ECQ, KINATIGAN (Hirit ng LGUs sa IATF) COMMUNITY QUARANTINE BAGUHIN RELIGIOUS ACTIVITIES NG ARCHDIOCESE OF MANILA TIGIL NG 12 ARAW ILANG LUGAR SA LUZON, VISAYAS NAKA-GCQ NA MARAMI PANG QUARANTINE FACILITIES ITATAYO