(Isusulong sa Senado) FULL INTEROPERABILITY SA GOBYERNO

DAHIL sa inilunsad na online application kung saan maaaring makakuha ng libreng employment certificate ang overseas Filipino workers (OFWs), isusulong ni Senador Jinggoy Ejercito Estrada ang pagsasabatas ng mga hakbang upang maging ganap na ang interoperability ng lahat ng sistema at serbisyo ng gobyerno para mapabilis ang digital transformation sa bansa at mabawasan ang red tape.

“Ang mga ganitong makabagong hakbang na maituturing nating milestone ay mapapangalagaan ang kapakanan ng ating mga itinuturing na bagong bayani. Sa pagsasalibre ng Overseas Employment Certificates (OECs), ipinamamalas natin ang respeto at pagpapahalaga na nararapat sa kanila. Umaasa ako na maipagpapatuloy natin at maitataguyod ang digital transformation para mapabuti, maging mas produktibo at transparent ang mga operasyon at proseso sa gobyerno,” sabi ni Estrada.

Inihayag ito ni Estrada matapos maiulat ang binubuong app ng Department of Migrant Workers (DMW) para sa OEC at gawin itong libre para sa OFWs.

Isinusulong ni Estrada, chairperson ng Senate Committee on Labor, Employment, and Human Resources Development, ang pagkakaroon ng simple at mabilis na proseso at serbisyo sa pamamagitan ng electronic government (e-government) kabilang ang pagpapatupad ng online na sistema sa pagbabayad at sa mga transaksyon na may kaugnayan sa pagpaparehistro ng negosyo, gayundin ang pagtatatag ng E-Government Master Plan pati na ang pagtataguyod ng digital payments bilang pambansang patakaran sa mga transaksiyon sa gobyerno.

Kabilang sa mga inihain ng senador ang “Use of Digital Payments Act” na nakapaloob sa Senate Bill No. 803 at layong pahusayin ang transparency at pabilisin ang pamamahagi ng mga tulong pinansyal sa mga nangangailangan sa panahon ng krisis. Ipinapanukala rin nito ang pagsasabatas ng digital payment scheme para sa mga produkto, serbisyo at iba pang isinasagawang transaksiyon ng gobyerno.

Ang isa pang ipinapanukala ni Estrada, ang Senate Bill No. 455 o “E-Government Act,” ay nakatuon sa pagkakaroon ng legal framework para sa pagbalangkas ng E-Government Master Plan. Kabilang dito ang mga probisyon para sa interoperability, database and resource sharing network, archives, records management system at isang online na sistema sa pagbabayad at iba pa.

“Sa pamamagitan ng isang user-friendly app, tulad ng isang app na nakatuon sa pagbibigay ng OECs, makakatipid tayo ng oras at gastusin sa gobyerno at ng mga OFWs habang nasisiguro ang pagkakaroon ng accessible at agarang serbisyo sa mga OFWs,” diin ni Estrada.

“Marami nang bansa ang nagpapatupad ng iba’t ibang uri ng e-government at nagkaroon na ng digital transformation ng kanilang financial system upang mapaigting ang pagbibigay ng serbisyo sa publiko. Kailangan natin sumabay sa mga pagbabagong ito upang mapakinabangan natin ang benepisyo ng teknolohiya tungo sa pagpapabuti ng serbisyo para sa ating mga mamamayan,” dagdag pa niya.

-VICKY CERVALES