LAGUNA- NALAMBAT ng mga puwersa ng PDEA at Sta. Cruz, Laguna police drug enforcement unit ang isa sa tinaguriang high value target individual sa Laguna dahil sa umano’y pagbebenta nito ng droga sa mga pangunahing bayan sa nasabing lalawigan.
Kinilala ni Lt.Col..Paterno Domondon Jr.ang suspek na si Eugene Bactad, 31-anyos, may- asawa at residente ng Sitio 5, Barangay Bagumbayan, Sta Cruz.
Ayon sa pulisya si Bactad ay kawani ng Laguna provincial jail guard na nakadestino sa ward ng inmates na pawang mga may drug cases.
Ayon kay Domondon, isang tip ang kanilang natanggap sa napipintong bentahan ng shabu sa area ng suspek kung kaya’ t mabilis silang nagsagawa ng operasyon ng bilihan sa lugar.
Dakong ala-5 ng hapon makaraan tanggapin ng suspek mula sa poseur buyer ang pera kapalit ng shabu ay agad itong inaresto ng mga operatiba.
Nasamsam kay Bactad ang tatlong heat-sealed transparent plastic sachet ng shabu na may market value na P68,000.
Kasalukuyang nakakulong si Bactad sa Laguna custodial center. ARMAN CAMBE