JAMES, ANTETOKOUNMPO SA  ALL-NBA FIRST TEAM

LOS ANGELES –  Napili sina Milwaukee Bucks superstar Giannis Antetokounmpo at four-time league MVP LeBron James sa All-NBA First Team.

Naitala ni Los Angeles Lakers forward James ang league record sa kanyang ika-16 na  All-NBA Team selection, kung saan nalagpasan niya sina Kareem Abdul-Jabbar, Kobe Bryant at Tim Duncan, na pawang may  15.

Si James ay may 13 selections sa  First Team, dalawa sa Second Team at isa sa Third Team.

Samantala, si reigning league MVP Antetokounmpo ay mayroon na ngayong kabuuang apat na All-NBA selections, kabilang ang dalawa sa First Team.

Siya at si James ay kapwa tumanggap ng All-NBA First Team votes sa lahat ng 100 ballots upang tumapos na may tig-500 points. Ang voting ay isinagawa ng isang grupo ng sports journalists mula sa US at Canada.

Nakasama nina James at Antetokounmpo sa All-NBA First Team sina Houston Rockets guard James Harden (474 points), Lakers forward Anthony Davis (455) a Dallas Mavericks guard Luka Doncic (416).