JASON ABALOS DUMANAS NG HIRAP PARA MAGING TRANSGENDER

MAPANONOOD na ngayong araw ang pilot episode ng “Asawa Ko, Karibal Ko” na tampok sina Kris Bernal, ang nagbabalik-Kapuso na si Rayver Cruz.  Pero ang dalawa pang hinangaan sa bumubuo ng cast ay sina Jason Abalos at Thea Tolentino. Special participation lamang si Jason dahil siya ang asawa ni Kris na isa palang beki at nag-decide siyang mag-undergo ng sex change.  Nang transgender na siya, si Thea na ang gaganap sa kanyang role.

Kung nahirapan si Jason na maging transgender, nahirapan din si Thea na maging babae na malaki ang boses. Iyon daw ang inaaral pa rin niya, kung paano niya babaguhin ang boses niya. Hindi raw kasi nababago ang boses ng isang lalaki kahit naging transgender na siya.

May time pa si Thea na mag-aral sa pagpapalit ng boses niya dahil sa third week pa ng serye siya lalabas bilang si Venus.

Mapapanood ang “Asawa Ko Karibal Ko” Mondays to Saturdays, pagkatapos ng “Eat Bulaga.”

SANYA LOPEZ PINAG-AAGAWAN NG 2 HARI NG KAPUSO

ANG swerte naman ng Kapuso actress na si Sanya Lopez, dalawang hari ng Kapuso Network ang mag-aagawan sa kanya.  At ma­swerte rin yata si Sanya sa mga actor na nagsisimula sa letter ‘D’ ang names.  Katatapos din lamang ni Sanya gawin ang “Wild and Free” movie sa Regal Films na first time silang nagtambal ni Derrick Monasterio.

At ngayon dalawang Kapuso actor na parehong ‘D’ ang names ay siyang makatatambal ni Sanya.  Hindi lamang basta-basta mga actor na makakasama niya, sina Kapuso Primetime King Dingdong Dantes at Kapuso Drama King Dennis Trillo.  Sila ang mga bidang makakasama ni Sanya sa forthcoming primetime drama series na “Cain at Abel.”  Kung paano magaganap ang agawan na ito, ito ang tiyak na aabangan ng mga televiewer.

Overwhelmed naman si Sanya nang tanungin namin kung ano ang feeling niya na dalawang mahuhusay na Kapuso actor ang makatatambal niya.

“Never ko po in-expect na makatatambal ko sila,” nakangiting sagot ni Sanya.  “Noon po ay natutuwa akong panoorin sila dahil ang huhusay nilang umarte, mga idol ko sila.  Ngayon, katambal ko na sila.  I’m just very grateful po sa GMA sa pagbibigay nila ng malaking opportunity na ito.  Wala akong maipa-promise kundi pag­husayan ko ang pagganap ko para naman hindi ako mapahiya kina Dingdong at Dennis, sa isa sa makakasama pa namin dito, ang multi-talented Kapuso actress na si Solenn Heussaff.  Nakasama ko na po siya sa “Encantadia” at nakita ko na ang husay niya sa pagganap.”

Nagsimula nang mag-taping ang “Cain at Abel” under Mark Reyes, pero hindi pa alam kung kailan sila mapanonood.

CAST NG VICTOR MAGTANGGOL SA ENCHANTED KINGDOM

INVITED ng Enchanted Kingdom ang cast ng “Victor Magtanggol” at iba pang Kapuso stars last Saturday, October 20, when they celebrated their 23rd anniversary.  Dumating sina Alden Richards, Andrea Torres, John Estrada, Pancho Magno at Yuan Francisco ng “Victor Magtanggol” at iba pang Kapuso stars.  Ang GMA Kapuso Show ay ginanap sa Agila Grounds ng Enchanted Kingdom at 6:00 PM.