JIMMY ALAPAG, MISIS NA SI LJ MAY PARATING NA BABY

TUWANG-TUWA ang  mag-asawang  Jimmy Alapag at actress LJ Moreno sa ‘di Inaasahang pagkakaroon nila ng bagong baby sa  panahon ng COVID-19 pandemic.

Sa FB account ng actress ay kinausap niya ang mga anak nila ni coach Alapag sa magandang balita na magkakaroon sila ng bagong baby na ilang weeks pa lang sa tiyan  ni Mrs. Alapag. Sa kasalukuyan ay tatlo na ang anak ni Alapag kay LJ.

Plano ni Alapag bumalik na sa America  kasama ang pamilya upang doon muna manirahan at para makasama rin ang mga magulang  na nakatira sa California. Si ‘Mighty Mouse’ ay deputy coach ng San Miguel Beer at head coach ng Alab Pilipinas na nag-champion noong 2018 sa ABL. Sa ngayon ay malabong magkaroon ng ABL dahil ang format ng laro ay sa iba’t ibang bansa ginagawa  ang mga laro. Dapat sana, ang opening ng liga ay sa November at tatagal  hanggang Mayo 2021.

Ayon sa manager ni Alapag na si Charlie Dy, team owner ng Alab Pilipinas, anytime ay puwedeng bumalik si coach Jimmy kapag kailangan siya dito sa Pinas. Sa ngayon ay happy ang family nina coach Jimmy at LJ sa pagdating ng kanilang ika-4 na anak.  Sa kasalukuyan ay nandito pa sa Pinas ang pamilya ni Alapag.

o0o

Abangan ang small forward ng Barangay  Ginebra na si Arthur dela Cruz sa pagbubukas ng 45th season ng PBA — Philippine Cup — bagama’t mainit ang usapan na iti-trade itong si Dela Cruz sa ibang koponan. Kagagaling lang sa ACL injury  ang anak ng ex-PBA player na si Art Dela Cruz.

Ngayon ay handa na si Arthur upang sumagupa, mahusay itong player na aasahan ni coach Tim Cone sa  PBA opening kapag tapos na ang MECQ. Matapang at may shooting itong si Dela Cruz kaya malabo itong ipamigay ni coach Cone.

o0o

Malamang ay mahinto na ang isyu ng trade kay Ray Parks matapos itong pumirma  ng isang taong kontrata sa TNT KaTropa. Ang siste ay noong wala pang kontrata si Parks ay naging mainit ang balita na nais siyang kunin ng Brgy Ginebra. Puwede naman itong mangyari kahit may kontrata ang player kapag gustong i-trade ng management ay walang magagawa ang player. Hintayin na lang natin dahil maugong pa rin ang balita na posibleng mai-trade si Parks.