JOINT EXPLORATION SA WEST PH SEA, SAGOT SA MATAAS NA PETROLYO

ANG  joint exploration sa West Philippine Sea  ang sagot sa patuloy na pagtaas ng presyo ng langis sa pandaigdigang pamilihan.

Ito ang pahayag ng Malacañang kasabay ng pag-amin na hindi nila kontrolado ang presyohan ng langis sa merkado  na  pumalo sa P60 kada litro ang petrolyo sa mga gasolinahan.

Ayon kay Presidential Spokesman Secretary Harry Roque, kailangang ipursige ang joint exploration at dapat isantabi na ang anumang hidwaan ng anumang bansa.

Sinabi nito na wala talagang magagawa ang Malacañang para pigilan ang pagtaas ng presyo ng  petrolyo sa merkado dahil hindi naman maaaring basta na lamang suspendihin ang excise tax sa petrolyo.

Sa probisyon ng TRAIN law ay kaila­ngang manatili sa $80  per barrel ang average price ng langis sa world market sa loob ng tatlong  buwan bago suspendihin ng pamahalaan ang excise tax na sinisingil sa petrolyo na pumapasok sa Filipinas.