MAGKATUWANG na ilulunsad ng National Press Club of the Philippines (NPC) at Federation of Filipino – Chinese Chamber of Commerce and Industry, Inc., ang kauna-unahang ‘Manila Mayoralty Candidates Forum’ na inaasahang magaganap sa Marso 28, 2022.
Ang kasunduan ay dinaan sa simpleng kamayan nina Wilson Flores, kolumnista at FFCCII Publication Committee chairman, bilang kinatawan ni Federation President Dr. Henry Lim Bon Liong at NPC President Paul M. Gutierrez, na sinaksihan ni NPC Dir. Benedict Abaygar.
Layunin ng Forum na mabigyan ng pagkakataon ang apat na kandidatong alkalde—Atty. Alex Lopez, Vice Mayor Shielah ‘Honey’ Lacuna-Pangan, Rep. Amado Bagatsing at retired police general, Elmer Jamias—na mailatag sa publiko ang kani-kanilang programa para sa Maynila, ang kapitolyo ng bansa.
Gaganapin ang Forum sa gusali ng FFCCII sa Binondo, Maynila.