JONES CUP: MIGHTY SPORTS MINASAKER ANG JAPAN

KUMARERA ang Mighty Sports sa ikatlong sunod na panalo sa 2019 William Jones Cup makaraang paglaruan ang Japan, 94-59,  kahapon sa Taiwan.

Nanalasa ang Mighty Sports sa second quarter kung saan nalimitahan nito ang Japan sa 9 points lamang, at nagbuhos ng 31 points sa third quarter.

Nagbida si Renaldo Balkman para sa Mighty Sports na may double-double na 27 points at 12 rebounds, habang nagdagdag sina Eugene Phelps ng 19 points at Mikey Williams ng 17 markers.

Bumuslo ang Mighty Sports ng 51.5% mula sa field, habang nagkasya lamang ang Japan sa 29.3% shooting. Sa 32 three-point attempts ay lima lamang ang naipasok ng Japan.

Nauna nang tinalo ng Mighty Sports ang  Iran, 98-72, at Jordan, 90-74.

Magbabalik sila sa aksiyon sa Lunes ng hapon laban sa Canada.