CAVITE – KAMATAYAN ang sinapit ng isang barangay kagawad na sinasabing naningil ng pautang makaraang ratratin ng kanyang kapitbahay sa bahagi ng Barangay Buna Lejos 1 sa bayan ng Indang sa lalawigang ito kahapon ng umaga.
Naisugod naman sa pagamutan ang biktimang si Willy Costa subalit idineklarang patay dahil sa mga tama ng bala sa iba’t ibang bahagi ng katawan.
Habang tinutugis naman ng pulisya ang suspek na si Cerilo Berber na mabilis tumakas, bitbit ang baril na ginamit sa krimen.
Sa inisyal na police report mula sa Camp Pantaleon Garcia, sinisingil ng biktima ang suspek sa kanyang pagkakautang kung saan humantong sa matinding pagtatalo saka nauwi sa pamamaril.
Walang nagawa ang ilang nakasaksi sa pamamaril ng suspek kundi isugod ang biktima sa pinakamalapit na pagamutan habang nagsagawa na ng malawakang manhunt operation ang pulisya laban kay Berber.
MHAR BASCO