KAHANGA-HANGANG KARANASAN NG MGA PARING PINOY SA ROME

ROME, Italy- KILALA  si Pope Francis sa pagiging mapagkumbaba, subalit namangha ang grupo ng mga paring Filipino sa ginawa ng Santo Papa sa kanila na mistulang umaktong isang ama.

Ito ay nangyari nang paalis na ang mga pari  sa silid sa Apostolic Pa­lace para  makapagdaos na ang Santo Papa  ng  meeting sa  mga obispo ng Filipinas nitong Lu­nes nang bigla silang ki­nawayan at tinawag.

Sa salaysay ni Fr. Kali Pietre Llamado  ng  Manila archdiocese, hindi nila inaasahan na sila ay tatawagin ni Pope Francis at pabalikin sa gitna ng napaka-pormal na  kaganapan.

Pinaikutan ng mga ito si Pope Francis  na nagpasalamat sa kanilang lahat: ‘Thank you for accompanying the bishops here. I will talk to them now. I know you are always praying for me,” ang pahayag ng Santo Papa.

“Then he waved his hand to us and sweetly said ‘Bye bye!’ What a loving gesture from a real father to us,”  dagdag ni Llamado.

Nasa  30 mga pari ang  sumama sa mga  obispo mula sa Metro Manila at northern Luzon na nasa  kanilang ad limina visits sa Rome.

Kabilang sa mga ito ay sina  Fr. Marvin Mejia, secretary general  ng  Philippine bishops’ conference,  ang iba ay  bishops’ secretaries, at mga pari na nag-aaral sa  Rome kabilang dito si Fr. Luciano Acuña, writer ng Tinig ng Pastol sa PILIPINO Mirror na nayakap pa ng Santo Papa.

Sinabi ni Fr. Llamado,  na  Vice-Rector ng  Manila Cathedral, na  kahanga-hanga at inspirational ang pangyayari.

“It’s just amazing that instead of just dismissing us, he (Pope) talked to us personally,” pahayag ni Fr. Llamado. “It’s like saying that he valued our presence there.”

Ang ad limina visits ng  Filipino bishops ay itinakda  sa tatlong magkakaibang grupo  at ang bawat isang grupo ay  mayroong  isang linggo  na mananatili sa Rome.

Matapos ang Luzon group, magtutungo naman dito ang  mga obispo mula sa Bicol region at  Visayas at pagkatapos ay ang  prelates mula sa Mindanao  at mula sa ecclesiastical province ng Lipa.

Ito ang unang  ad limina visit para sa  Filipino bishops sa ilalim ng Francis’ papacy. Ang pinakahuli ay noong  2011 sa panahon  ni  Pope Emeritus Benedict XVI.