KALINISAN NG LUNGSOD TUNGKULIN NG LGU AT MGA RESIDENTE

SINABI ni Manila Mayor Isko Moreno na ang pagpapanatili ng kalinisan sa lungsod ng Maynila sa lahat ng oras ay kapwa tungkulin ng lokal na pamahalaan at mga residente ng lungsod.

Tiniyak ni Moreno na tuloy-tuloy ang normal na operasyon sa lungsod kung saan mas pinaigting pa ang paglilinis sa mga mga kanto at kasulok-sulokan upang matiyak na walang basurang nagkalat o nakatambak.

Pinuri ng alkalde ang Department of Public Services (DPS) at Manila Disaster Risk Reduction Management Office (MDRRMO) sa patuloy na cleanup operations na naging bahagi na ng kanilang araw-araw na gawain.

Ang DPS ay nakakolekta ng napakaraming basura at mga bahagi ng sirang gamit sa kahabaan ng Northbay Bridge mula Juan Luna Street hanggang Tayuman Street at hanggang Justice Abad Santos Avenue.

Gayundin, ang flushing operations na ginawa ng mga kawani ng MDRRMO sa paligid ng Recto at Divisoria araw-araw upang mataganggal ang mga nakadikit na dumi sa kalye na maaaring magdulot ng mga sakit.

“Muli, tayo ay nagpapasalamat sa mga kawani ng DPS at MDRRMO sa matiyaga nilang paglilinis sa iba’t -ibang sulok ng ating lungsod.

Huwag rin po nating kalimutan na bawat isa sa atin ay may responsibilidad na panatilihing maayos ang Maynila,”diin ng alkalde.

Umapela rin si Moreno sa lahat ng mga residente ng lungsod na gawin nila ang kanilang bahagi upang mapanatili ang kalinisan ng Maynila sa lahat ng oras sa pamamagitan ng pagtatapon ng basura sa tamang paraan at pagpapanatili ng kalinisan sa loob at labas ng kanilang mga tahanan. VERLIN RUIZ