ILOCOS NORTE- ARESTADO ang isang kandidato sa pagka-kapitan ng barangay sa Laoag City makaraang makuhanan ng iligal na droga.
Batay sa report ng Laoag Police ang suspek ay nakilalang si Wendel Tamayo, isang incumbent barangay councilman at residente ng Barangay 4, Laoag City.
Ayon sa mga operatiba ng Laoag Police at Provicial Drug Enforcement Unit (PDEU) nakatanggap sila ng impormasyon na gumagamit umano ng ipinagbabawal na gamot ang suspek kaya agad na isinagawa ang pagsalakay sa bahay nito.
Sa isinagawang operasyon, naaresto ang suspek at nakakuha ang mga operatiba ng shabu, isang sachet ng marijuana at mga drug paraphernalia sa bahay ng suspek.
Mahigpit naman itinangi ng suspek na sangkot siya sa iligal na droga at sinabing ang raid ay may halong pulitika.
Nakatakdang sampahan ng kasong paglabag sa Section 11 ng Republic Act 9165. EVELYN GARCIA