KAPATID NI GUO HUMARAP SA SENADO

Humarap na sa Senado ang kapatid ng na-dismiss na mayor ng Bamban na si Alice Guo.

Sinabi ni Shiela Guo, kapatid ni Alice Guo nitong Martes na hindi niya alam ang kinaroroonan ng dating alkalde matapos silang maghiwalay sa Indonesia.

“Hindi ko po alam,” sagot ni Shiela nang tanungin ni Senate Pro Tempore Jinggoy Estrada kung nasaan ang kapatid.

Sinabi rin ni Shiela na wala siyang komunikasyon kay Alice at sa kanilang kapatid na si Wesley, idinagdag na hiwalay din si Wesley sa kanila.

Aniya, dumating sila sa Indonesia noong Agosto 18 at naghiwalay sa pagitan ng Agosto 19 o 20.

Hindi aniya sinabi ni Alice kung saan siya pupunta at sinabing: “Hiwalay lang muna, ate.”

“Tapos tanong ko siya saan siya punta, sabi niya sa akin, ‘wag daw ako alamin,” dagdag pa niya.

Kasunod ng mga tugon ni Shiela, ibinunyag ni Senador Risa Hontiveros na base sa kanyang natanggap na impormasyon, may apat na hotel rooms na naka-book sa Batam, Indonesia na aniya ay nagpahiwatig na mayroong grupo na nag-book ng hotel.

“Just to point out Ms. Shiela sabi niyo sa Indonesia hiwa-hiwalay kayo pero impormasyon po kami na doon sa Batam, Indonesia…nag-book po siya ng apat na kwarto,” ipinunto ni Hontiveros.

LIZA SORIANO