KARAGATAN NG AKLAN GINA-GALUGAD, SEAMAN NAGLAHO SA BARGE

AKLAN – HINDI pa rin nakikita ang isang seaman na pinaniniwalaang nahulog sa isang barge sa Boracay Island.

Gayunman, tiniyak ng Philippine Coast Guard (PCG) Aklan at Municipal Disaster Risk Reduction Ma­nagement Office (MDRRMO)-Malay na hindi sila titigil sa pag­hahanap sa biktima.

Ayon kay Lt. Cdr. Marlo Acevedo ng PCG-Aklan, naglalayag ang LCM Divine Providence barge  papuntang Tabon port nang mapansin ng kapitan na si Eddie Norico  na wala si Ronaldo Tolinero, 57, residente ng Barangay Dumatad, Tangalan, Aklan.

Dahil dito, kaagad siyang humingi ng tulong upang mahanap ang biktima ngunit sa kasamaang palad dulot ng masamang pa­nahon ay pansamantala silang tumigil.

Malakas ang hinala ng iba pang crew na nahulog ang biktima sa dagat. PILIPINO MIRROR REPORTORIAL TEAM