NUEVA ECIJA-TATLO ang nasawi kabilang ang dalawang sundalo habang isa pa ang ang sugatan nang mabangga ang kanilang sinasakyang tricycle ng dalawang sasakyan sa Emilio Vergara Highway sakop ng Barangay Valle Cruz , Cabanatuan City.
Base sa report ng Cabanatuan City PNP, sangkot sa karambola ang tricycle, Innova van at tanker truck.
Batay sa imbestigasyon, magkasunod na tumatakbo ang tricycle na minamaneho ng nasawing driver na si Malik Matuan, sakay ang tatlong sundalo at ang Innova patungong north direction nang masalpok ng Innova ang hulihang bahagi ng tricycle.
Dahil dito, nawalan ng kontrol ang driver ng tricycle at napapunta ang mga ito sa linya ng kasalubong kungsaan nabangga naman ang mga ito ng paparating na tanker truck.
Sa lakas nang pagkabangga, wasak ang tricycle at nagtamo ng pinsala ang apat na sakay.
Bukod sa driver, nasawi rin ang dalawang sundalong sakay nito na sina Joel Villanueva at Rainhearth Christian Panit na noon ay patungo sa Fort Magsaysay.
Sugatan naman na isinugod sa ospital ang isa pang sundalong pasahero na kinilalang si Cain Correche.
Nasa kustodiya ng Cabanatuan City police ang driver ng van at ang driver ng tanker na parehong nahaharap sa kasong reckless imprudence resulting in multiple homicide, physical injuries at damage to properties. BONG RIVERA