KASO NG COVID-19 SA PASAY BUMABA NA

BUMABA na lamang sa 53 ang naitalang bagong kaso ng CO­VID-19 sa Pasay City.

Ayon kay Pasay City Mayor Emi Calixto-Rubiano, sa mga nagdaang araw ay unti-unting bumababa na ang kaso ng COVID-19 sa lungsod.

Naniniwala ito na dahil sa pinaigting na pagsasagawa ng contact tracing na naging bahagi na rin ng kanilang sistema na prevent-detec­t-isolate-treat-reintegrate (PDITR).

“Mula po sa double digits na contact tracing ay talaga pong ginawa naming three digits ang contact tracing noong nagkaroon ng surge noong Marso,” anang alkalde.

Naging kapuna-puna ang biglang pagbaba ng kaso ng virus sa lungsod na nag-aave­rage ng 197 bagong kaso nitong buwan ng Marso hanggang sa bumaba na lamang ito sa 53 nitong Sabado.

Tinukoy ng alkalde na ang sikreto ng tagumpay na ito ng lungsod ay dahil na rin sa ipinakitang kooperasyon sa pagitan ng mga opisyal ng lokal na pamahalaan at ng mga residente ng Pasay.

“Talagang nagtulong-tulong po ang lahat ng departamento ng city hall, kasama po natin ang mga barangay officials, kapulisan at iba pang sangay ng gobyerno upang tiyakin na maayos ang pagpapatupad ng a­ting granular lockdowns,” anito.

Gayunpaman, sinabi ng pamahalaang Lungsod na mayroon pa ring 327 kabahayan sa 138 barangay ang nasa gra­nular lockdown habang naiwan pa ang isang barangay na nasa total lockdown.

Sa pagbaba ng mga bagong kaso ng virus sa lungsod, ang occupancy rate sa mga isolation facilities ay bumaba na rin kung kaya’t nagkaroon na ng mga bakanteng kama na umaaabot na rin sa 20%. MARIVIC FERNANDEZ