KASO NG LEPTOS TUMAAS NG 13%

TUMAAS ng 13% ang mga kaso ng leptospirosis na naitala ng Department of Health (DOH) sa bansa nitong unang kalahatian ng taong 2021, kumpara noong nakaraang taon.

Ayon kay DOH Undersecretary Maria Rosario Vergeire, nakapagtala sila ng 589 leptospirosis cases mula Enero 1 hanggang Hunyo 19.

Aniya,mas mataas ito kumpara sa 520 leptospirosis cases lamang na naitala naman sa kahalintulad na panahon noong 2020.

Tumaas naman ang case fatality rate mula sa leptospirosis ng 11.4% nitong 2021 mula sa 9.8% lamang noong 2020.

Ani Vergeire, ang pinakamataas na leptospirosis incidence ay naitala sa Cordillera region na may 1.49 cases per 100,000 population, kasunod ang Region 6 na may 1.34 cases at Region 2 na may 1.33 cases.

Kaugnay nito, hinikayat ng DOH ang publiko na maging maingat laban sa leptospirosis lalo na nga­yong ilang araw nang nag-uulan sa iba’t ibang panig ng bansa na nagdudulot ng mga pagbaha.

“Tayo po ay mag-iingat pag tayo ay lumulusong sa baha. Kailangan po nating magsuot ng mga protective gear… Tayo po ay laging maglilinis ng paa pagkatapos tayo ay lumusong, hugasan ng sabon at tubig,” ani Vergeire, sa isang pulong balitaan.

“Kailangan po, linisin natin ang kapaligiran natin. Nakukuha po natin ang leptospirosis dahil po sa ihi ng mga hayop na napupunta po sa gutter natin ng tubig,” aniya pa.

Babala pa niya, bukod sa leptospirosis ang maru­ming kapaligiran na may tubig ay maaari ring maging breeding ground ng mga lamok na maaari ring magdulot ng dengue infection.

Una nang iniulat ng DOH na ang mga kaso ng dengue sa bansa ay bu­maba ng 48% ngayong taon dahil na rin maraming tao, partikular na ang mga bata, ang nananatili lamang sa kanilang mga tahanan.

Ang leptospirosis ay nakukuha mula sa bacteria na leptospira na mula sa ihi at dumi ng daga na nahahalo sa tubig-baha.

Babala ng DOH, ang leptospirosis ay maaaring makamatay kung mapapabayaan. ANA ROSARIO
HERNANDEZ