KC CONCEPCION ‘DI PA RIN TINATANTANAN

MATAGAL-TAGAL na rin namang wala sa limelight si KC Concepcion, mas pinili niyang maging isang businesswoman kaysa sa pag-aartista. Nagiging maingay lang ang kanyang kampo pagdating sa kanyang lovelife.

Kahit na pilit na ma­ging pribadong mamamayan ni KC ay hindi rin niya mapigilan ang sarili na mag-post anything about her lovelife, as one way of connecting with her loyal fans.

Pero kahit hindi na masyadong aktibo sa showbiz ay may mga bashers pa rin si KC. Tulad na lang ng komento sa isang larawan na pinost niya sa kanyang social media account. Hindi ito pinalagpas ng isang basher sa pagsasabing ‘taba, taba, taba’. Hindi na bago para kay KC na matawag siyang taba sa kanyang mga larawan pero tila hindi naman siya tinatantanan ng bashers niya. Tulad ng naunang sagot ni KC sa namba-bash sa kanya noon na isang tabachingching, say ni KC sa naturang basher:

“Happy ka na sa ginawa mong ‘yan?” Very cool na tugon ni KC.

Sa ngayon ay abalang-abala sa kanyang mga negosyo si KC at sa pag-aaral. Halos wala na ngang pahinga ang byuti ni KC, kinakailangan din niyan magbyahe lagi sa ibang bansa para sa kanyang negosyo at patuloy sa pag-aaral. Kung kaya tila malabo pa ang pagbabalik-showbiz ng anak ng megastar.

INAH DE BELEN MAGPAPAKA-DARING NA

SA ngayon ay wala pang balita kung ano ang susunod na gagawin ni Inah de Belen sa GMA7 pagkatapos ng hit series niyang “Ika-5 Utos” kasama ang real life boypren na si Jake Vargas. Pero kapansin-pansin na panay naman post niya ng mga sexy picture niya in swimwear sa kanyang socmed.

Kaya sari-sari ang na­ging reaksyon ng kanyang mga followers. Summer daw naman nga­yon at may K naman si Inah na mag-suot ng swimwear. Kering-keri ng dalaga. May nagsasabi naman na naghahanda lang daw si Inah para sa susunod niyang proyekto sa GMA 7 na may pagka-sexy and daring, true kaya?

Say naman ng young actress na hindi pa siya handang magpaka-daring, naglagay lang daw siya ng picture niya na naka-bikini sa kanyang account pero inalis na rin daw niya ‘yun agad. Pinuna kaya siya ng boypren na si Jake sa ginawa niyang pagpo-post in sexy swimwear?

Say pa rin ni Inah, wala naman daw nagbabawal sa kanya na mag-post sa kanyang sariling account desisyon niya raw iyon at desisyon niya rin na tanggalin agad ito. Pero nagkalat na nga sa internet.