KIEFER, SHIGA WINALIS ANG IBARAKI

GUMAWA si Kiefer Ravena ng ilang key plays sa huling bahagi ng laro nang makaulit ang kanyang Shiga Lakestars laban sa Ibaraki Robots, 85-77, upang walisin ang kanilang homestand sa Ukaruchan Arena sa Division 1 ng Japan Professional Basketball League (B.League).

Naging mabagal ang simula ni Ravena ngunit umiskor ng 6 points at nagbigay ng 4 assists sa dikdikang  fourth quarter upang tulungan ang Shiga na maitakas ang panalo.

Tumapos ang Filipino import na may 11 points at 7 assists para sa Lakestars na umangat sa 3-1 para sa season, habang nanatiling walang panalo ang Robots sa apat na laro.

Nanguna si Tomomasa Ozawa para sa Shiga na may 17 points, habang nagdagdag sina imports Novar Gadson at  Sean O’mara ng 16 at 15, ayon sa pagkakasunod.

Tinalo ng Shiga ang Ibaraki, 93-88, sa una sa  back-to-back matchups noong Sabado.

Sumalang si Ravena sa laro na may averages na 14.7 points at  6.3 assists, bukod pa sa 41.7% clip mula sa three-point range sa tatlong laro para sa Lakestars.

Samantala, nakaganti si Thirdy Ravena at ang kanyang San-en NeoPhoenix squad kay Kobe Paras at sa Niigata Albirex BB, 85-82, sa Division 1.

Nalusutan ng San-en ang paghahabol ng Niigata sa pangunguna nina Yuhito Nomi at  Rosco Allen sa huling bahagi ng fourth period.  Abante sa 77-71, may 1:25 ang nalalabi, umiskor sina Nomi at Tsihilidzi Nepaue ng 4 points upang tapyasin ang kanilang deficit sa 2 points, may 42 segundo ang nalalabi.

Isinalpak ni Keishi Matsuwaki ang isang tres upang palobohin ang kalamangan papasok sa final moments ng laro, bago kumana si Allen ng isa pang tres upang makadikit ang Niigata sa 82-80, may 12 segundo ang nalalabi.

Sinelyuhan ng free throws nina Robert Carter at Morihisa Yamauchi ang panalo ng  San-en.

Naging krusyal si Ravena sa panalo ng San-en makaraang kumamada ng 13 points at 9 rebounds.

Nagtala si Carter ng 22 points, habang nagdagdag sina Justin Knox at  Elias Harris ng tig-11 points para sa NeoPhoenix.

Nalimitahan si Paras sa 11 points makaraang gumawa ng 21 sa kanilang unang paghaharap. Tumipa si Allen ng 24 points at nag-ambag si Jeff Ayres ng 14 markers para sa Niigata.

Ang dallawang koponan ay mayroon na ngayong 2-2 kartada.

Related posts:

KIEFER BALIK-PBA SA HUNYO 24 KIEFER BALIK-ENSAYO SA NLEX , GILAS KIEFER NAPAIYAK NANGMATALO ANG GILAS SA ANGOLA KIEFER NAIS SUMUNOD KAY THIRDY SA JAPAN B. LEAGUE (Kiefer pumirma sa Japan B. League) ‘DI PUWEDE ‘YAN — PBA CHIEF B.LEAGUE: THIRDY, SAN-EN RUMESBAK SA SHIGA KYOTO PINULBOS NG KIEFER-LED SHIGA SA JAPAN B.LEAGUE B. LEAGUE: KIEFER, SHIGA  ‘OLAT’  NA NAMAN SA CHIBA