KILOS PROTESTA SA SONA NI DUTERTE IPINAGBAWAL

HINDI pinagbigyan ng Quezon City Police District (QCPD) ang kahilingan ng grupong Bagong Alyansang Makabayan o Bayan Muna na magsagawa ng kilos protesta sa Commonwealth Ave­nue QC sa araw ng State of the Nation Address (SONA) ni Pangulong Rodrigo Duterte sa Lunes, July 26, 2021.

Ito ay dahil na rin sa banta ng Delta Variant na COVID-19 na posibleng kumalat sa mga raliyista.

Ayon kay Ret. Ge­neral Elmo San Diego, hepe ng Department of Public Order and Safety (DPOS), nagdesisyon ang QCPD na huwag payagan ang anumang rally dahil maaari umano itong maging super spreader event o pagkahawa ng virus.

Base sa Advisory ng Department of Interior and Local Government (DILG) noong nakaraang taon, hindi papayagan ang anumang mga kilos protesta sa isasagawang SONA ni Duterte dahil sa banta ng hawaan n g COVID-19.

Ngunit papayagan pa rin daw ng QCPD ang mga raliyista na magtipon sa Freedom Park sa harap ng tanggapan ng Commission on Human Rights (CHR) para sa maikling programa.

Pero babantayan pa rin umano ito ng QCPD para matiyak na masusunod ang mga alintuntunin ng minimum health standards tulad ng pagsusuot ng face mask, face shield at social distancing.

Una nang sinabi ng OCTA Research Group, bumibilis ngayon ang Reproduction Rate ng COVID-19 sa NCR.

Ito ang ginamit na batayan ng QCPD para ibasura ang kahilingan ng Bayan Muna na magsagawa ng kilos protesta sa SONA ng Pangulo sa Lunes. EVELYN GARCIA