(Kinokonsidera sa ilalim ng Alert Level 4) REOPENING NG MASSAGE PARLORS

KINOKONSIDERA ng pamahalaan na payagan ang operasyon ng iba pang personal care services sa ilalim ng Alert Level 4 para mas marami ang makabalik sa trabaho at mapasigla ang ekonomiya na labis na naapektuhan ng pandemya.

“Kino-consider ng IATF (Inter-Agency Tak Force) ang pagbubukas ng ibang activities pa,” pahayag ni Trade Secretary Ramon Lopez sa state-run PTV’s Laging Handa.

“For Alert Level 4, ‘yung mga iniisip pa na mga activity na puwedeng i-reconsider, ito ‘yung mga naiwan pa na mga other personal care services… as long as merong mga safety protocols na ino-observe ay i-allow na rin po ‘yan,” aniya.

Ani Lopez, kabilang dito ang therapeutic establishments o massage parlors.

Ang Metro Manila ay nasa ilalim ng Alert Level 4 hanggang Oktubre 15.

Sa ilalim ng naturang alert level, ang personal care services tulad ng barbershops, salons, at nail care service establishments ay pinapayagang mag-operate sa 20% indoor capacity ngunit para lamang sa mga fully vaccinated customer habang ang outdoor services ay may 30% venue capacity, bakunado man o hindi ang customer.

Pinapayagan din ang Indoor dining o dine-in services sa 20% capacity para sa mga bakunado, habang ang outdoor o al fresco dining ay pinahihintulutan sa 30% capacity, anuman ang vaccination status ng customer.

Nadagdag din ang fitness centers at gyms sa listahan ng mga negosyo na pinayagang mag-operate sa ilalim ng Alert Level 4, bagama’t sa 20% capacity at magpapatupad ng four-meter distancing sa mga customer.

“Marami ring nasa ganyang industriya, maraming trabaho ang nag-aantay diyan na makabalik,” anang DTI chief.

“Very limited ang nasama sa personal care services, so ang nire-reconsider po ‘yung other personal care services sa Alert Level 4,” dagdag pa niya.