CAGAYAN-BLANGKO pa rin ang mga pulis sa motibo ng mga salarin sa ginawang pagpatay sa isang 32- anyos na lalaki na isinilid sa drum saka itinapon sa Cagayan River .
Natagpuan ng mga awtoridad ang bangkay na nakasilid sa loob ng drum nitong nakalipas na Linggo sa bahagi ng Solana sa lalawigan ng Cagayan.
Sa imbestigasyon ng Solana Police, kinilala ang biktima na si Rowel Unabia,dating seaman at residente ng Brgy. Maddalero, Buguey.
Ayon sa PNP Scene Of the Crime Operatives, hinihinalang pinatay ang lalaki sa pamamagitan ng pagsaksak sa dibdib ng biktima.
Nadiskubre ang bangkay matapos na makita ng isang construction worker ang drum na palutang-lutang sa Cagayan River sa bahagi ng Brgy. Maddarulug, Solana.
Nilangoy umano ng construction worker ang drum para dalhin sa pampang sa hinalang maaring pagkaperahan ito subalit nanghilakbot ito ng isang bangkay ang tumambad sa kanya nang buksan ito.
Patuloy naman ang imbestigasyon para matukoy ang motibo at kung sino ang nasa likod ng pagpatay sa biktima. VERLIN RUIZ