MATAPOS mabigyan ng kasiyahan sa Star City ang 280 kabataan ay nagsagawa naman ng libreng flu vaccination ang lokal na pamahalaan ng Pasay kaugnay sa isang linggong aktibidad ng gift-giving bilang selebrasyon ng kaarawan ni Mayor Emi Calixto-Rubiano sa Agosto 16.
Tumanggap ang mga senior citizen ng flu vaccines na nagmula sa limang barangay na kinabibilangan ng Barangay 84, 85, 86, 87 at 90.
Ang pagtuturok ng flu vaccines sa mga senior citizen ay bahagi ng HELP program (Health and housing, Education, economic growth and environment, Livelihood and lifestyle, Peace and order, Palengke at Pamilya).
Dagdag pa ni Calixto-Rubiano na ang pamamahagi ng libreng flu vaccines sa mga senior ay isa ring pamamaraan ng selebrasyon para sa residente ng lungsod.
Matatandaan na nito lamang Agosto 11 ay nagkaloob ng isang ‘birthday treat’ si Calixto-Rubiano kung saan personal na sinamahan ng alkalde na mabigyan ng kasiyahan ang 280 kabataan sa Star City. MF