LIBRENG SWAB TESTING PALALAWAKIN

DAHIL sa patuloy na paglobo ng COVID-19 cases, higit pang palalawakin ng pamahalaang lungsod ng Maynila ang libreng swab testing sa nakatakdang pagdating ng bagong donasyong RT-PCR machine.

Kasabay nito, naghahanap na si Mayor Isko Moreno ng dalawang medical technologists para sa nasabing bagong makina bilang karagdagan sa ginagamit ng Sta. Ana Hospital.

Sa nasabing ospital dinadala ang samples mula sa mga nagpa-swabbed sa alinmang city-run hospitals o drive-thru center at binabasa ng mga professional na nagsanay para sa ganitong gawain.

Kaugnay pa nito, nanawagan si Moreno sa mga residente na umiwas sa ‘shortcuts’ upang huwag maging biktima ng mga sindikato ng hindi awtorisadong swab testing dahil ang resulta nito ay siguradong peke at magdudulot ng kapahamakan hindi lang sa biktima kundi sa mismong sambayanan dahil sa maling impormasyon.

Ang pahayag ng alkalde ay matapos na makatanggap ng ulat mula sa netizen na may isang bahay sa Singalong, Malate na may pangalang “Swab Express” at nagsasagawa ng swab tests sa loob ng isang tent kapalit ng P3,000 na agad inimbestigahan ng special mayor’s reaction team (SMART).

“Wag kayong mag-shortcut dahil may health issue na involved. Kung gusto nyo sa clinic o ospital punta kayo sa legitimate na me mukha at opisina. Hindi pwede sa kalsada. Ang masakit pa, may bayad. Sa mga OFWs, huwag na kayo pupunta diyan unless me iba kayong layunin,” ani Moreno.

Iginiit nito, ang city government ay nagbibigay ng libreng swab testing sa six city-run hospitals at drive-thru center sa Quirino Grandstand, bukod pa sa home service para sa mga physically-challenged na mga residente ng lungsod. VERLIN RUIZ