LIMIT SA INCOMING TRAVELLERS ALISIN NA

HINIHILING sa pamahalaan ng Philippine air carriers na nago-operate sa Ninoy Aquino International Airport (NAIA), na alisin ang limitasyon ng arriving Filipino galing  abroad, at payagan ang mga incoming traveller papasok sa bansa upang  makatulong sa pag-angat ng ekonomiya.

Sa kasalukuyan ay 2,000 ang bilang o limit capacity ng mga pasahero na  pinapayagang  makapasok sa mga paliparan sa bawat araw alinsunod sa  kautusan ng Inter-Agency Task Force (IATF).

Ito ang itinuturing na pangunahing dahilan sa pagkalugi ng local airline industry sa bansa at sa pagkakatigil sa trabaho ng mga empleyado  nito  bunsod sa pagkakatengga ng kanilang mga eroplano sa airport.

Kaugnay nito ay humihingi ng konsiderasyon ang local airline officials na alisin na ang limitasyon, o payagan ang mga turista na makapasok sa bansa dahil mayroon namang sapat na  protective measures katulad ng  testing at quarantine protocols.

Batay sa record ng Manila International Airport Authority (MIAA), bago ang pandemic, ang  Ninoy Aquino International Airport terminals ay nakaka-accommodate ng mahigit sa  34,000 incoming passengers sa kada araw mula sa 40 international and local airlines, ngunit sa kasalukuyan at 2,000 incoming passengers  na  lamang ang limit na  makalapag sa NAIA terminals na  lulan ng 36 airlines.

Hiling ng airline companies na  payagan  ang pagpasok ng mga turista sa bansa dahil  hindi lamang sa kapakanan ng  local at international air carriers ang nakasalalay rito kundi  maging ang naghihikahos na  mga Filipino. FROI MORALLOS