RIZAL – ARESTADO ang live-in partner nang makumpiskahan ng P100,000 halaga ng droga sa anti-drug operation ng pulisya kamakalawa ng madaling araw sa Binangonan.
Ayon sa ulat ni Rizal PNP Provincial Director Officer in Charge Col. Rainerio de Chavez, kinilala ang dalawa na sina alyas Dagul at Mumay kapwa residente ng Brgy., Bilibiran, ng nabanggit na bayan.
Nabatid na dakong alas-1:40 ng madaling araw nang bentahan ng droga ng mga suspek ang isang nakasibilyang pulis sa halagang P500.
Dahil dito, inaresto ang dalawa at nakumpiska dito ang limang plastic sachet ng hinihinalang shabu na nagkakahalaga ng P98,600.00.
Kasong paglabag sa RA9165 ang kinakaharap ng dalawa habang nakapiit sa detention cell ng pulisya.
Ayon kay de Chavez, ang pagdakip sa mga suspek ay nagpapakita ng seryosong paglaban ng kapulisan sa droga upang pigilan ito.
ELMA MORALES