NAVOTAS CITY – ARESTADO ang dalawang construction worker matapos pagtulungang bugbugin ang isang kalugar na lolo makaraan ang mainitang pagtatalo habang nag-iinuman sa lungsod.
Nakilala ang mga naarestong suspek na sina Adonis Beltran, 37-anyos, at Alvin Pilapil, 45-anyos, kapwa ng Quintos St. Brgy. San Jose na parehong nahaharap ngayon sa kaukulang kaso.
Sa nakarating na report kay Navotas Police Chief Col. Rolando Balasabas, alas-4 ng hapon, nag-iinuman ang mga suspek at biktimang si Francisco Dela Faz, 63, nang magkaroon ang mga ito ng mainitang pagtatalo sa hindi malamang dahilan.
Sa kainitan ng pagtatalo, pinagtulungang bugbugin ng mga suspek ang biktima na naging dahilan upang magtamo ito ng mga sugat sa katawan.
Humingi naman ng tulong ang kaanak ng biktima kay PCpl Rey Daza na nagresulta sa pagkakaaresto sa mga suspek. VICK TANES
