MADUGONG BARANGAY ELECTIONS?

MUKHANG hindi maganda ang hudyat ng kampanya ng barangay elections sa ating bansa. Ayon sa Philippine Na­tional Police (PNP) 21 na ang namatay sa 16 na mga insidente na maaaring kaugnay sa eleksi­yon ng barangay at Sang­guniang Kabataan. Wow!

Kaya minsan ako ay napapaisip kung ano ang mayroon sa pagiging opisyal ng barangay o Sangguniang Kabataan (SK) upang umabot sa patayan. Noong Sabado na lang, ang isa sa mga staff ni ARMM Gov. Mujiv Hataman na ang mga kamag-anak ay tu­matakbong kagawad sa Maguindanao ay tinam­bangan.

Siya ay si Betsy Yap. Nagtatrabaho kay Gov. Hataman bilang humani­tarian emergency assis­tance and response team. Minalas siya at namatay nang tambangan ang ka­nilang sasakyan. Kasama niya ang kanyang ina na kagawad ng bayan ng South Upi, Maguindan­ao. 27 years old lamang si Betsy. Ayon kay Gov. Hataman, malamang ang target nga ay ang mga kagawad na tumatakbo bilang mga re-election­ist.

Ito ang mga unang hamon kay PNP chief Director General Oscar Albayalde bilang bagong pinuno ng nasabing ahen­siya. Ipinag-utos niya na mas paigtingin ang se­guridad sa mga election hotspots at sa mga iba pang barangay na maaaring maging mainit ang labanan upang makaiwas sa karagdagang election violence.

Noong isang linggo, nagpalabas ang DILG at ang PDEA ng listahan ng lahat ng mga opisyal ng barangay na sangkot sa iligal na droga.

Magandang hak­bangin ito. Maganda na rin na nalalaman ng mga botante ang mga kuma­kandidato sa kanilang barangay. Isipin ninyo kung ang mga opisyal ng barangay at SK ng ating barangay ay gumagamit o nagbebenta ng droga, talagang hindi mawawa­la ang krimen sa nasa­bing lugar.

Ang ibang mga ku­makandidato naman ay samu’t sari ang mga gimik sa kanilang kam­panya sa hangarin na makakakuha sila ng dag­dag boto sa kanilang ba­rangay. Mayroon kayong makikita na campaign posters na ginamit ang sikat na pelikula tung­kol sa superheroes ng “Avengers: Infinity War”. Makikita mo ang pulutong ng kumakandi­datong barangay kapitan kasama ang kanyang mga kagawad ay nag­mistulang miyembro ng Avengers.

Mayroon din mga iba riyan na gagamitin ang mga lumang litrato na nakasama nila ang mga kasalukuyang opisyal ng gobyerno o politiko at ginagamit nila sa ka­nilang campaign poster. Parang ipinapalabas nila na ‘close’ sila sa mga opisyal o politiko na ito at tutulungan sila kapag sila ay ibinoto bilang opisyal ng kanilang ba­rangay. Haaaaay.

Sabi nga ni COME­LEC executive direc­tor na si James Jimenez na hindi bobo ang mga botante at makukuha sa mga ganitong mababa­baw ng gimik. Nagbigay babala rin ang COME­LEC tungkol sa dapat na gastusin ng mga tu­matakbo sa halalan. Li­mang piso lamang ang maaaring gastusin kada botante. Kaya, suriin ninyong mabuti sa estilo ng kanilang pangangam­panya, masusukat mo kung sumusobra sila sa gastusin. At kung bong­ga ang gastos nila…saan nila ito babawiin? Kung ang mga kumakandidato ay handang pumatay ng kanyang katunggali sa halalan, ano nga ba ang mayroon sa kaban ng ba­rangay? Tsk tsk tsk.

Isang linggo na lang at matatapos na ang kam­panya na ito. Sampol pa lang ito. Ang hintayin natin ay ang mas matin­ding mid-term election sa susunod na taon para sa senador, kongresman at mga lokal ng opisyal. Sana naman ay hindi ma­dugo ito.