ALBAY – KALUNOS-LUNOS na kamatayan ang sinapit ng mag-amang nagmomotorsiklo makaraang masalpok at magulungan ng pampasaherong bus sa kahabaan ng highway sa bahagi ng Purok 2, Sitio Panisijican sa Barangay Buenasuerte, bayan ng Uson, Masbate kamakalawa ng hapon.
Hindi na naisugod sa pagamutan ang mag-amang Richard Alburo, guro sa Buenvista National High School, at Clint Alburo, 19, college student at kapwa nakatira sa nabanggit na barangay.
Samantala, arestado naman ang driver ng bus na si Ely Delos Reyes na nahaharap sa kasong double homicide.
Ayon sa ulat ng pulisya, pauwi na ang mag-amang sakay ng motorsiklo nang biglang nagpagewang-gewang ang kanilang sasakyan bago sumalpok sa kasalubong na Baby Boy Bus.
Pumailalim pa ang motorsiklo ng mag-ama kaya nakaladkad ng ilang metro bago kapwa nagulungan ng bus habang patuloy naman ang imbestigasyon ng pulisya. MHAR BASCO
Comments are closed.