MAG-AMA NIRATRAT SA KUBO KRITIKAL

LAGUNA – NANANATILING kritikal sa pagamutan ang 34-anyos na lalaking negosyante kabilang ang anim na taong gulang nitong anak na babae matapos pagbabarilin ng hindi pa nakikilalang salarin habang mahimbing na natutulog ang mga ito sa loob ng isang kubo sa Brgy. Paliparan, bayan ng Calauan, Miyerkules ng gabi.

Base sa ulat ni Maj. Davy Hebron, hepe ng pulisya,nakilala ang biktimang si Arnold Bustarga at anak nitong si Ayesha Denise, pawang mga residente ng nasabing lugar.

Bandang alas-10 ng gabi nang maganap ang insidente kung saan puwersahan umanong pumasok ang suspek sa loob ng kanilang kubo bago nito pinagbabaril gamit ang kalibre 45 pistola hanggang sa mawalan ang mga ito ng malay.

Mabilis na tumakas ang suspek makaraan ang pamamaril patungo ng hindi pa mabatid na lugar kung saan target ito ngayon ng pulisya.

Kaugnay nito, magkahiwalay na isinugod sa pagamutan ng mga residente sa lugar ang mga biktima na pawang sumasailalim sa maselan na operasyon bunsod ng tinamong mga tama ng bala sa kanilang mga katawan.

Samantala, sa pamamagitan umano ng isinagawang salaysay ng biktimang si Bustarga habang isinusugod ito sa pagamutan ng kanyang mga kaanak, kinilala nito ang suspek na responsable sa naganap na pamamaril habang patuloy na sumasailalim sa masusing imbestigasyon ng pulisya ang naturang kaso. DICK GARAY