ARESTADO ang isang ama at kanyang anak na lalaki sa ikinasang buy-bust operation ng mga tauhan ng Parañaque police Station Drug Enforcement Unit (SDEU) na nakumpiskahan ang P714,000 halaga ng shabu nitong Huwebes.
Kinilala ni Parañaque police chief Col. Maximo Sebastian ang inarestong mag-ama na sina Archieval David Tesoro, 44-anyos at Aldrich Gabriel, 21-anyos, kapwa residente ng Parañaque City.
Base sa report na natanggap ni Sebastian, matagumpay na naisagawa ang buy-bust operation ng SDEU dakong alas-4:20 ng madaling araw sa Pictorial Lane, Fourth Estate Subdivision, Barangay San Antonio, Parañaque City.
Sa ikinasang buy-bust operation laban sa mga suspek ay nakarekober ang mga operatiba ng SDEU ng aabot sa 105 gramo ng shabu na nagkakahalaga ng P714,000.
Kasalukuyang nakapiit ang mga suspek sa Parañaque police custodial facility habang inihahanda ang pagsasampa ng kasong paglabag sa R.A. 9165 (illegal possession of prohibited drugs) sa Parañaque City prosecutor’s office. MARIVIC FERNANDEZ