VALENZUELA CITY – ARESTADO ang dalawang babae na nanggulo at nangagat sa umaarestong barangay tanod makaraang ireklamo ng pag-iingay kamakalawa ng madaling araw sa Valenzuela City.
Nahaharap sa kasong slight physical injury, malicious mischief, direct assault, at resisting arrest si alyas Joan ng Canumay West, Valenzuela City habang kinasuhan naman si alyas Jen ng malicious mischief, unjust vexation, disobedience upon a person in authority.
Ayon sa report ng Valenzuela Police, naganap ang insidente bandang 1:00 Lunes ng madaling araw sa loob ng Sacred Heart Compound, San Diego Street, Canumay West habang masayang nag-iinuman ang mag-aamiga.
Pinakiusapan ng isang Annalyn Rosal, ang isa sa suspek na hinaan ang kanilang boses dahil madaling-araw na subalit biglang nag-init ang mga ito at binasag ang bote ng kanilang ininom na alak pati ang tagayan at winasak din ang pinto ng inuupahang silid kaya’t tumawag na ng tanod ang biktima.
Pagdating ng mga tanod ay ipinaalam din ng mga ito ang insidente sa kasera ng biktima.
Ayon pa sa report, nang kinakausap na ng mga tanod ang mga suspek ay biglang sinapak ng isa si Analyn saka tumakbo ngunit nadapa kaya’t dinampot ng mga tanod ngunit kinagat naman nito sa likod ang tanod.
Hindi na pinatagal pa ng mga barangay tanod ang pagwawala ng dalawa kaya dinala na ito sa Valenzuela City Police para harapin ang kaso. VICK TANES
Comments are closed.